هندسة كهربة

هنشوف دلوقت قسم جميل قوى



و كلمة الهندسة الكهربية يعنى العلم او العمل اللى بيختص طبعاً بالكهرباء

و تطبيقاته (فى رايى) اوسع التطبيقات انتشاراً سواء على مستوى الانسان العادى

(كمبيوتر , تليفزيونات او حتى الكهرباء اللى فى الفيشة , حتى التليفونات ارضية

او محمولة او فضائية برضه تبعنا ...) يعنى حياتنا كلها ,و كمان على

مستوى الاعمال و الصناعات اساس لاى صناعة سواء بالقليل او الكثير

يعنى باختصار ..كهرباء ده هو قسم المستقبل فعلاً
ومهندسين الكهرباء 3 انواع

*مهندس اتصالات :-
و ده شغله الاساسى بيكون فى الاتصالات (سلكية او لاسلكية) يعنى مثلاً شركات المحمول ,و شركات الاتصالات ,راديو ,...باختصار اى حاجة فيها موجات او ارسال او شبكات .

و فى نفس الوقت يقدر يشتغل فى الاليكترونيات (و ده برضه من ضمن تخصصه الاساسى) و يقدر يصمم دوائر اليكترونية او يحللها (يعنى يصلحها او يعدل فيها)
من اول الراديو لحد الماذر بورد ,لكن للاسف فى مصر (او الدول العربية عامةً) نادر جدا لما حد يشتغل فى التصميم

لكن الجامعة الوحيدة فى مصر اللى فيها قسم اليكترونيات فقط هى جامعة المنوفية .

و كمان ممكن يشتغل تحكم الى او كونترول ,و ده هشرحه بعدين لو حد سأل , بس المجال ده مش من ضمن تخصص اتصالات بس بيدرس شوية فيه ,لكن هو اصلاً تبع باور و اصلاً اصلاً تبع كمبيوتر

* مهندس قوى (باور) :-

و ده شغله الاساسى فى كهرباء الضغط العالى يعنى الات كهربية و توليد كهرباء

(يعنى اى كهرباء ضغط عالى و اى كهرباء بتمشى فى سلوك و او الات كهربية)

و ده مجال شغله متاح بشكل كويس لان اى مصنع بيحتاج مهندسين قوى علشان

الالات و الشبكة الكهربية للمصنع .



و المجال التانى لشغل مهندس الباور هو التحكم الالى او الكونترول و ده مجال شغله كويس و مطلوب جداً



القسم التالت (و اللى فى بعض الجامعات منفصل عن كهرباء ) هو

* و مهندس الكمبيوتر

و الاسم الرسمى للقسم :قسم حاسبات و تحكم الى

و اكيد طبعاً شغله فى الكمبيوتر (تصميم برامج ,قواعد بيانات , انظمة تشغيل,....)
و طبعاً بيكون عارف فى الهاردوير

ده غير التحكم الالى (و هما اساس الموضوع ده فى الاصل)

و التحكم الالى ده زى مثلاً فى خطوط الانتاج (السيور دى اللى بنشوفها ماشية فى التليفزيون عليها غالباً مكرونة و بتتحط فى اكياس) و طبعا دى محتاجة واحد
يصممها و يكون مسئول عنها , و بتدرس فيه لغات برمجة زى BLC و دى مش لغة برمجة بالمعنى المفهوم انما حاجة زيها كدة بيستخدم فيها هاردوير







نيجى بقى للمواد



طبعاً انت دخلت كهرباء يعنى انت اكيد كويس فى الرياضة و بالذات فى التكامل(و خصوصاً اتصالات) و كويس طبعاً فى الفيزياء الكهربية و المغناطيسية اللى انت اخدتها فى اعدادى


هتدرس فى سنة اولى مواد عامة للقسمين (زى تحليل دوائر كهربية ,قياسات كهربية,رياضة,فيزياء,كهرومغناطيسية......)

يبدأ تخصصك من تانى سنة (باور او اتصالات او كمبيوتر ما عدا بعض الجامعات)


نبدأ باتصالات
هتدخل اتصالات يعنى انت قررت انك تقضى باقى حياتك بتدرس فى خيال علمى

و علشان تكون كويس فى اتصالات لازم تكون فاهم كويس مادة الكمبيوتر اللى اخدتها فى اعدادى ,و لو تعرف عن اشباه الموصلات و الترنزستورات يكون جميل (و لو متعرفش هتعرف )

و المواد اللى بتدرسها بتكون عن اليكترونيات (اساسها الترانزستور)

,آى سى (الدوائر المتكاملة) ,لوجيك (او منطق , اللى

هو بتاع الزيرو و الواحد و ده من اسس الهندسة الالكيترونية),

ده غير ميكروويف -(مش الفرن)- ومواد بتتكلم عن الموجات, و

ميكروبروسيسور ,ده غير طبعاً الرياضة اللى بتفضل تدرسها لحد اول ترم من سنة تالتة و بعد كدة هتلاقيها بتندمج لوحدها كدة فى باقى المواد


نيجى بعد كدة لباور
هتدرس مواد عن الالات الكهربية (ماشين) و دى عن المواتير و المولدات ,

باور (و دى عن شبكات الكهرباء) ,

ده غير الكنترول بمواده المختلفة ,و مجالات كهرومغناطيسية , و طبعاً لازم

حتة كدة اليكترونيات



اما بقى قسم كمبيوتر
فبيدرسوا تقريباً زينا فى بعض الحاجات زى الميكروبروسيسور ,لوجيك(او دوائر منطقية) ,ده غير طبعاً انظمة تشغيل (يعنى ازاى تعمل نظام تشغيل زى ويندوز مثلاً ,و الكنترول او التحكم الالى ,و الداتا بيس ,

و دى تقريبا المواد اللى انا اعرفها فى كمبيوتر

لكن عموماً الـ3 اقسام متشابهين مع بعض فى مواد كتير لكن بتختلف فى كثافة المادة و تركيزها , و اتصالات و كمبيوتر اقرب لبعض فى الدراسة من اتصالات و باور


ودى كانت يا شطار نبذة مختصرة عن قسم كهرباء

حد عنده سؤال ؟

حد عنده سؤال ؟

ايوة كدة

و يا رب اكون افدت

منقول للافاده

ايه دة يابنى

ماشى يا عم مجدى

ايه الحلاوه دى

اللة يخليك يا ناصفنى