وادى اول خناقة
عمر: بس تسلم إيدك يا "سارة" الأكل اللي عملتيه في عزومة بابا وماما ولا الأكل من إيد شيف محترف
سارة: طبعا يا ابني, إنت ربنا كان راضي عنك يوم ما اتجوزتك
عمر: طبعا يا حبي... بس هي العزومة اتكلفت كام بقى؟
سارة: ماتسألش.
عمر: يعني مصروف البيت هيكفي لآخر رمضان؟
سارة: ماتقلقش يا حبيبي هيكفي طبعا, على الأقل هيكفي مصاريف الأكل والشرب
عمر: هو فيه مصاريف غيرها؟
سارة: الكحك.. ولا إنت نسيت؟
عمر (بلا مبالاة): آه إن شاء الله
سارة: طبعا إن شاء الله.. بس اعمل إنت بس حسابك
.
عمر : ماما بتعمل كمية كحك كبيرة وكانت قالت لي يعني
سارة:قالت لك إيه هة؟
عمر: قالت يعني أدفع معاها في تمنه وهي تدينا نصيبنا فيه زي ما بتعمل مع "علي" أخويا ومراته.
سارة :"كريمة" مراة أخوك "علي" ما لهاش في عمايل الكحك، عشان كده متكلة على أمك, لكن أنا باعمل كحك وبسكويت وكل حاجة ولا الجاهز. وكمان أنا مابحبش نفس مامتك في الكحك.
عمر: نعم؟ طيب نجيب جاهز على قد 100 جنيه كده, عشان حتى ماتتعبيش في العمايل، واهو طعم الجاهز بيبقى ممتاز فعلا.
سارة: يعنى معاك 100 جنيه..
عمر هاستلف من الواد "محمد" صاحبي.
سارة: والله؟
عمر: هاعمل إيه يعني هاضرب الأرض تطلع بطيخ ثم يجرى بسرعة لينام علشان ميكملش كلام .
وبعد يومين
سارة: جبت الـ100 جنيه
.
عمر (مستعبطا): 100 جنيه بتوع إيه؟
سارة (وهي تنفخ): بتوع الكحك.
عمر: آاااااااه, ما أنا هابقى أنزل بكره ولا بعده أروح اشتري الكحك في حدود الـ 100 جنيه, ماتتعبيش نفسك إنتِ يا نور عيني.
سارة: لأ أنا عايزه أتعب, هاتهم وأنا هاجيب الكحك.
عمر :ليه؟
سارة: عشان إنت ممكن يضحكوا عليك في السعر ولا يدوك كحك مش كويس.
عمر: مش كويس ازاي يعني؟!
سارة: يعني عندهم من السنة اللي فاتت.
عمر: يا سلام؟
سارة (وبراءة الأطفال في عينيها): طبعا, لما الكحك ما بيتباعش بيرشوا عليه مواد حافظة ويخزنوه للسنة اللي بعدها..
عمر : يا شيخة؟
سارة: أمال إيه يا ابني إنت ماتعرفش ولا إيه؟
عمر: لا ماعرفش.
سارة: مادام ماتعرفش, هات الـ100 جنيه بقى.
عمر :خدي, بس ما تزوديش عن 100 جنيه في الشرا, هه؟.
سارة: طبعا... طبعا
اليوم التالى
يدخل "عمر" المنزل قبل المغرب يلاقى "سارة" وأخواتها البنات وقد شالو أثاث الصالة وشغالين فى عامايل وملىء الصاجات بالكحك والبسكويت
يسلم "عمر" على البنات ثم يدخل غرفة النوم وينادي على سارة
عمر: إيه ده يا هانم, احنا مش اتفقنا نجيب كحك جاهز على قد الـ 100 جنيه؟
سارة: ده أنا دخت على الحلوانية, كل الكحك مرشوش مواد حافظة.
عمر وهوا هيصق من الغيظ : وبعدين؟
سارة: وبعدين قلت مفيش غير إني أعمل في البيت بقى.
عمر: إنت بتشتغليني يا هانم.... أنا قلت مفيش غير 100 جنيه هادفعها في الكحك.
سارة: ما أنا ما دفعتش غير 100 جنيه.
عمر : يعني هتعملي كحك على قد الـ100 جنيه؟
سارة كوهيا بتضحك ده الـ100 جنيه دول يدوبك كفوا حق السمنة.
عمر: أمال معناه إيه إنك ما دفعتيش غير 100 جنيه؟
سارة: استلفت الباقي من ماما, وربنا يخليك بقى وتردهم.
عمر وهوا متنرفز :ويخليني ليه؟ خليكِ إنتِ بقى وابقي عيدي مع الكحك بتاعك أنا هاعيد في بيت أمي ويخرج زعلان وغضبان من مراتة.
وحيث إن "سارة" تعرف طيبة قلب زوجها فإنها تتركه ليذهب وتنشغل هي بعمايل الكحك.
اليوم التالي
تتصل "سارة" بـ"عمر" على الموبايل وهوا فى الشغل بس هوا مش بيرد عليها وتستمر محاولات اتصالها به على مدار اليوم ولكنه يستمر في تجاهلها, وتفطر هذا اليوم لوحدها علشان أخواتها البنات خلصوا عمل الكحك معاها وراحو لاختهم المتزوجة اصلهم خمس أخوات في عين الحسود
وبعد مرور يوما اخر
مازال "عمر" مش بيرد على تليفونات "سارة" وهي تخشى الاتصال به في بيت والدته حتى لا تسمع منها ما لا يرضيها.
بعد أن تفطر "سارة" تانى يوم لوحدها "تعصر على نفسها كيلو ليمون" وتتصل ببيت حماتها.
سارة: سلام عليكم.
حماتها: وعليكم السلام.
سارة: أنا سارة يا ماما.
حماتها: ما أنا عارفة يا حبيبتي, ازيك؟ عملتِِِِ الكحك؟
سارة (لنفسها): ابتدينا الكلام اللى ملوش لازمة ..
(ثم لحماتها): آه الحمد لله
حماتها (بسخرية ): لما نشوف بقى السنة دي كحكنا ولا الكحكك بتاعك أما أروح أنده لك عمر
سارة (لنفسها): يكون قال لها إني قلت إني مابحبش الكحك بتاعها؟ دي تبقى مصيبة تانية.
عمر (ببرود): ألو.
سارة: ازيك يا "عمر".
عمر: الحمد لله.
سارة: إنت قاعد بتعمل إيه عند مامتك؟
عمر: يعني مش عارفة؟
سارة (بقلق): إنت حكيت لمامتك؟
عمر (بغلاسة): حكيت لها عن إيه؟
سارة: عن سوء التفاهم اللي حصل بينّا.
عمر (باستنكار وقد علا صوته): سوء تفاهم, ثم يخفض صوته, إنتِ بتسمي تطنيشك لكلامي وعمل الكحك من ورايا "سوء تفاهم"؟
سارة: يا حبيبي, معلش غلطة ومش هاعمل كده تاني بس ارجع البيت بقى ده أنا بقى لي يومين بافطر لوحدي.
عمر (وقد رق قليلا): أمال فين إخواتك؟
سارة: مشيوا يا حبيبي خلاص.
عمر: طيب.
سارة ( بلهفة): "طيب" يعني هترجع؟
عمر (بيتقل): هاشوف ظروفي.
سارة: "عمر".. انا ماوحشتكش؟
عمر: "صمت".
سارة: "عمر"
عمر: عاوزة إيه؟
سارة: إنت قلت لمامتك إنك زعلان مني؟.
عمر: لأ, قلت لها إن البيت زحمة عشان بتعملي الكحك وإني هاقعد عندهم في الروقان لغاية ما تخلصي.
سارة (غير مصدقة): وأمك صدقت الكلام ده؟ ما هم كمان بيعملوا كحك وعندهم دربكة.
عمر: بس أنا قاعد في الشقة اللي فوق لوحدي, مابانزلش غير على الفطار.
سارة (وقد اطمأن قلبها): طيب يلا بقى تعال ده الكحك طعمه زي العسل وأنا مش هاين عليّ أدوقه من غيرك.
عمر: طيب, هاصلي العشا وارجع على البيت.
سارة: بس اعمل حسابك إنك هتيجي تاخد من الكحك وتودي لمامتك عشان يعني يصدقوا الكلام اللي حكيته ليهم ويدقو الكحك بتاعى .
عمر: حاضر.
سارة: وكمان عشان مامتك تعرف كحك مين الأحسن .... اة بقى
عمر و سارة فى صوت واحد :هههههههههه
وبكدة نتنهى خناقة كحك العيد[center]
موضوع: فى رمضان 
السبت 10 نوفمبر 2007 - 20:17
